Dem baş, amadebûyiyên hêja, mamosta û lêkolerên birêz, zimanzan û nivîskarên birûmet, sazî û medyayên mandînenas, kesayetiyên xweşnav û naskirî ên civaka Kurdî, hemû aliyek bixêr bên. Spas ku ji riya dûr û nêzîk ve hatine vir.
Em wek Saziya KURDŞOP`ê xwe gelek bextewer dizanin û em kêfxweş in ku me kariye ew soza ku salekê berî niha di dema zindanîkirina Mamosta Zarayê de me dabû, wek erkeke pîroz û nîştimanî bi cih bigehînin.
Saziya KURDŞOP`ê bi dîtina wê valahiya mezin ku heye di warê ziman de, û bi hestkirina bi berpirsyariyeke neteweyî biryar da ku bo yekem car xelateke taybetî di biyavê ziman de pêşkêşî civaka Kurdî bike, heya ku nivîskar û mamosta û zimanzan bikarin şiyanên xwe tê de zêdetir nîşan bidin û zêdetir ji wan re bibe palder bo xizmetkirina bi zimanê Kurdî, û herwiha xelat jî xelatek be ku li gor çavnihêriya we zimandostên rêzdar be, û bibe sedema zêdetir vegeşandina zimanê Kurdî û pêwendiya di navbera zaravayan û zêdetir nasiyarbûna wan digel hevdu û danîna kevir li ser kevirê peyva Kurdî bo zêdetir bilindkirin û vegeşandina wê.
Mêhvanên qedirgiran!
Herwek ku em hemû dizanin, niha mamosta Zara di girtîgehê de ye, lê em xatircem in ew di girtîgehê de jî nasekine û dê xizmeta xwe bo zimanê Kurdî bidomîne, û dê waneyên xwe bêje, û Komara Îslamiya Îranê jî herçend wiha dihesibîne ku bi vî karê nemirovane ku dike, dikare rêgiriyê ji vegeşandina zimanê Kurdî bike, lê em xatircem in ku bi hebûna kesên wek mamosta Zarayê û gelek mamostayên din dê zimanê Kurdî hertim di kopîtkê de be.
Herwiha em dixwazin di vê rewşê de, ji riya Xelata Zarayê ve bi hevkariya pispor û dilsojên zimanê Kurdî bingeheke me`irîfî û sembolîk bo siberoja zimanê Kurdî û vegeşandina vê ava bikin.
Xatircem bin serbarê hemû pîlaneke neyaran bo helandina zimanê Kurdî û destbiserkirina mamostayan û astengkirina wan, lê em dikarin bi hezkirina zimanê dayîkê û vegeşandina wê serftinê bi dest bixin. Her wek ku Pêşewa Qazîmihemed ji bo hezkirina zimanê dayîkê kerem kiriye: Zimanê dayîkê beşek ji şîrê dayîkê ye ku tevlî xwîn û goşta me bûye. Lewra divê em li zimanê xwe hez bikin. Di dawiya axaftina xwe de hêvî dikim ku Mamosta Zara û hemû mamostayên din ên girtî bêne berdan ger li her cihekî bin, û hêvî dikim ku sala bihêt li Rojhilata Kurdistanê û li jêr siya alaya pîroz a Kurdistanê de em bikarin duyemîn merasima xelata Zara bi amadebûna Mamosta Zarayê bi rê ve bibin”.
Herwiha bi hewce jî dizanim silavan bişînim bo riha pak a hemû şehîdên Kurdistanê û bitaybetî şehîdên van dawiyane ên serhildana Rojhilatê Kurdistanê
Bijî Kurd
Bijî Kurdistan
Jin, Jiyan, Azadî
