Kurdshop - Li Berlîn a paytexta Almanyayê bi navê “Female Voice of Kurdistan” (Dengên Jinên Kurdistanê) dê festîvalek birêve biçe.
Hat ragehandin di festîvalê de dê ji her çar parçeyên Kurdistanê 8 hunermend di navbera 24 û 25ê Hezîranê de konserên zindî û online bidin.
Herwaha hat ragehandin di festîvalê de ji Bakurê Kurdistanê Berfîn Aktay û Sakîna Teyna, ji Başûrê Kurdistanê Kawyar Hadî û Wajeda Xêro, ji Rojavayê Kurdistanê Jînda Kanco û Sîdar Îbrahîm û ji Rojhilatê Kurdistanê jî Sahar Lotfî û Hanî Mojtedy wê stranên xwe bistirên.
Operaya Hemdem a Berlînê bi piştgiriya saziya fonê ya Berlînê ve dê festîvalê li dar bixe û dê konser li Berlîn a paytexta Almanya, li Villa Elizabethê birêve biçe.
Berî naha jî bi heman şêweyî ji bo jinên Afganistan û Îranê jî festîval bi rêya heman saziyê ve birêve çû. Saziyê beriya niha ji bo jinên Afganistanê bi navê “Dengên Jinên Afganistanê” û “Dengên Jinên Îranê” festîval pêk anîne.
Ji bo festîvala “Dengên Jinên Kurdistanê” salekê kar û xebat hatine kirin û piştî hilbijartina 8 hunermendên jin, dest bi amadekariyên festîvalê hatiye kirin.
Ji ber rewşa Kurdistanê, hunermendên Rojava û Başûr wê nikaribin li Berlînê konserên zindî pêşkêş bikin. Li şûna wê, konserên wan ên ku ji bo festîvalê di vîdeoyan de hatine tomarkirin, wê bi rêya sînevîzyonan bên nîşandan.
Yalda Yazdanî derhênera hunerê ya festîvalê ye ku tevî Andreas Rochhollê derhêner û çeker, ji bo vê festîvalê li Kurdistanê geriyane û xebatên festîvalê birêve birine.
Herwaha wê çîrokên hunermendên ku beşdarî festîvalê bûne jî weke vîdeoyên kurt bên nişandan.
