Şadî
Kurdshop – Hunermendê çêkirina Bafirokan Zahît Mungan ê xelkê Mêrdîn a Bakurê Kurdistanê ye, piştî bafirokekî sêalî ango sêbodî ya Teyrê Tawis çêkir û beşdarî festîvalekî Çînê bû û di wê festîvalê de madalya zêrîn bidest anî.
Hunermendê Zahît Mungan 32 saliye û xelkê Mêrdîn a Bakurê Kurdistanê ye û ji zaroktiya xwe heta naha pêwendiya wî bi bafirokan ve heye û 26 sale jî pê ve mijûle û ji bo xwe kiriye pîşe.
Zahît Mungan, bi çêkirina bafirokên profesyonel ve heta naha 30 welatan geriya ye û bi teknîkekî taybet ê çil pîneyî ve, du hezar parçeyan tîne gel hev û di 5 mehan de ew Teyrê Tawis û kêvroşka pifyayî yên ku çêkirî ve beşdarî Festîvala Navnetewî ya Bafirokan a 40.emîn a Weifang a Çînê bû.
Di Festîvalê de Zahît Mungan bi bafiroka Teyrê Tawis di beşa ‘’Bafirokên Verimandî yên Sêalî’’ de madalya zêrîn bidestxist. Herwaha di beşa Bafirokên Estetîk de jî madalya bronz bidest xist.
Zahît Mungan vê derbarê de ragehand, heskirina wî ya li hember bafirokan di temenê biçûk de destpê kiriye û çanda dewlemend a Mêrdînê jî di bafirokên xwe de dinexşîne.
Mungan got, hemû hebûnên çandî yên bajêr, mîtolojiya wê di bafirokên xwe de dinexşîne û diyar kir: ‘’Ji bo nimûne Şahmeran, dîsa kûçeyên me yên teng de ew kerên ku ji bo karê paqijiyê tên bikaranîn û herwaha min bafiroka kotrê jî çêkir. Herî dawî jî min bafiroka Teyrê Tawis ku ji bo Êzidiyan pîroz e, min afirand.’’
Zahît Mungan got, dema ku Teyrê Tawis çêkiriye gelek zehmetî kêşandiye û bi teknîkê çil pîneyî ve kariye di 5 mehan de xilas bike. Û ragehand: ‘’Çêkirina bafirokê de min hemû parçe bi hevdu ve dirûtin û wisa çêkir. Min pir pê ve zehmetî dît. Her parçeyekî wê bi dirûtinê ve û min kedekî mezin da. 6 metreyan dirêj û 5 metreyan jî firehiya bafirokê ye.’’
Zahît Mungan got, heta naha ez beşdarî gelek çalakiyên wisa bûme, lê ev 10 sale min dixwest ez beşdarî Festîvala Bafirokan a Çînê ya Navnetewî bibim û diyar kir: ‘’Dema ku tê gotin bafirok, berî hertiştî Çîn û Weifang tê bîra mirov. Ew der peytexta bafirokan e. Ez ji bo wê festîvalê hatim vexwandim. Min di festîvalê de Teyrê Tawis firand û ez bûm şampiyonê cîhanê. Di festîvalê de bafiroka min eleqeyekî mezin dît. Nêzîkî 60 welatan bi sedan beşdarvan hebûn. Ji ber ez di wê festîvalê de bûm yekem û madalya zêrîn bidestxist ez gelek keyfxweş im û ji bo min kelecanekî mezin e û min destheqê keda xwe wergirt.’’
